De Roli hät sit drü Wuche es Problem mit de Gschirrspüelmaschine. Sie wäscht zwar no, aber jedes Mol, wenn d Maschine duregloffe isch, dänn machts «zack!» und all Sicherige im Huus gheied use. Dasch doch obermüehsam so öppis, gopferdeckel. Muess er immer zum Sicherigschaschte und weder alli Hebel ue drucke. Saich das!
Guet, jetzt hät de Roli s Telefon id Hand gnoh und denn isch denn eine cho, vo de Herstellerfirma. Dä hät die Gschirrspüelmaschine ufgmacht, hät de Chopf ine gschtreckt und hät gseit: «Wüsset Sie, was Sie bruchet? Sie bruchet en Elektriker. Det hinde links gseht’s eso us, als wär es Käbeli verschmürzelet.» Jo, und denn isch denn halt de Elektriker cho. Mit de Taschelampe hät er wiit hindere glüchtet i die Gschirrspüelmaschine und denn hät er gseit: «Wüsset Sie, was Sie bruchet? Sie bruchet en Sanitär. Det hinde im Eggli isch’s jo richtig füecht, det chund irgendwie Wasser ine.» Jo, und denn isch denn halt de Sanitär cho. Mit verschednige Zange und Dichtigsring und hät probiert das Züg abzdichte, aber s hät nöd klappet. Es sig alles verzoge, die ganzi Konstruktion. Und denn hät er gseit: «Wüsset Sie, was Sie bruchet? Sie bruchet en Chuchibauer, dä muess das Ganze nomol neu konstruiere.» Jo, und denn isch denn halt de Chuchibauer cho und hät sich die Sach nomol gnau agluegt. Er isch mitem Chopf ganz wiit ine i die Gschirrspüelmaschine und hät scho gli use gruefe: «Wüsset Sie, was Sie bruchet? Sie bruchet es Wunder. Do isch nüt meh z rette.» «Ah jo?», hät de Roli denn gseit, «und wüsset Sie, was SIE jetzt bruchet? En Chrankewage!» Und denn het de Roli die Gschirrspüelmaschine eifach zue gschlezt.