Herbschtwind oder: Farbigs Ruusche
Wer schteckt dehinter
was für es Wääse
welli Erinnerig
oder was für e Technik
erzüügt de bsundrig Effekt
wo d’Chopfhuut chüelt
d’Hoor ufweiht
und jedi Poore elektrisiert
(aber nume ganz fiin).
Dänk an Winter
vor acht Johr
wo d’Fingerschpitze
gschmärzt händ
ohni dassi noime aacho wäre
dusse isch es so chalt gsi
dass d’Summervögel
mitemne luute Klirre
uf de Bode gheit sind.
Dänk an Momänt
wo s’Gsicht ändlich losloot
unter de Berüerig vo dinere Hand
und hüt raschlets wider unter de Füess
wenn du mir s’richtig Wort flüschterisch.
De neggscht Windschtoos
lüpft s’Härz i d’Luft
farbigs Ruusche
ich schnuuf süüferli us.
Über den Autor / die Autorin
By accepting you will be accessing a service provided by a third-party external to https://www.hunziker2020.ch/