Mer send drü Generatione Fraue
wo do spaziere of em Chornbärg
zwösche de Grüsch vo de Amsle
ond em Liecht im Blätterdach.
Am Wägrand streife mer
e Holderbluest nach de andere
mett onzählige chline Stärne
wie d’ Kristall vo Zucker oder
Stickereie of emene choschtbare Stoff.
Wiiter vore gsämmer en Ameissihuufe
chli versteckt im Ghölz. Jedi vo eus
hett scho mol driigstoche zom luege
wie sechs bewegt ond jedi vo eus
hett scho mol öppis Verbotnigs gmacht
aber amene bestemmte Ponkt
werd d’ Erennerig gärn stell.
Mer send e Chetti vo Ereignis
e Verbendig inere Gschecht
mer wösse om die guete Geischter
im Holderbaum
ond dass es es Tor gett
för de langi Wäg zrogg.